نائیجیریا میں فیول ٹینکر ٹرک دھماکے میں 60 افراد ہلاک

فیڈرل روڈ سیفٹی کور کا کہنا ہے کہ شمالی نائیجیریا میں پیٹرول ٹینکر الٹنے سے خوفناک دھماکہ ہوا جس کے نتیجے میں 60 افراد ہلاک جبکہ متعدد زخمی ہوئے۔ ہلاکتوں میں اضافے کا خدشہ ہے۔

میڈیا رپورٹس کے مطابق گزشتہ سال اکتوبر میں اسی طرح کا ایک خوفناک حادثہ پیش آیا تھا جس میں 147 افراد جان کی بازی ہارگئے تھے۔ یہ حادثہ افریقہ کی سب سے زیادہ آبادی والے ملک میں ہونے والے بدترین سانحات میں سے ایک تھا۔

فیڈرل روڈ سیفٹی کور کے مطابق مرنے والوں میں زیادہ تعداد غریب مقامی باشندوں کی ہے جو ٹرک الٹنے کے بعد پیٹرول نکالنے کے لیے وہاں پہنچے تھے۔ جب بڑی تعداد میں لوگ وہاں جمع ہوئے تو زور دار دھماکہ ہو گیا۔ زخمیوں اور لاشوں کا ہسپتال منتقل کر دیا گیا ہے۔